ભગવાન સ્વામિનારાયણના સંતકવિઓનાં કાવ્યોની વિશેષતા એટલે ચોસર પદો. ચાર ચારના સમૂહમાં તેમણે રચેલાં ભક્તિપદોને ચોસર કહેવામાં આવે છે. આ પદપ્રકાર દ્વારા તેમણે સ્વામિનારાયણીય સાધનાનો ખૂબ જ સુંદર ઉપદેશ પીરસીને મુમુક્ષુઓની મોક્ષની ભૂખ સંતોષી છે. આ ઉપદેશ પદો આધ્યાત્મિક માર્ગના દેદીપ્યમાન દીપકો છે કે જે સાધકને હંમેશ માટે આધ્યાત્મિક માર્ગ ઉજાગર કરતા રહેશે. બીએપીએસ સંસ્થાના સંગીતજ્ઞ સંતોના ભક્તિપૂર્ણ કંઠે ગવાયેલાં આવાં ભક્તિપદોનો સંપુટ – કરીએ રાજી ઘનશ્યામ, આપ સૌના હાથમાં મૂકતાં સ્વામિનારાયણ અક્ષરપીઠ આનંદની લાગણી અનુભવે છે.