તા. 11-8-2017, હ્યુસ્ટન
સ્વામીશ્રી આજે ‘બાળદિન’ની સભામાં પધાર્યા. એક બાળકે માનસીની વાત કરતાં કહ્યું કે ‘સ્વામી ! અમે આંખો બંધ કરીએ ત્યારે કાળું કાળું દેખાય છે. આપ આંખો બંધ કરો ત્યારે શું દેખાય છે ? તે લખી આપો.’
સ્વામીશ્રીની આગળ આઇ-પેડ ધરવામાં આવ્યું. સ્વામીશ્રીએ લખી આપ્યું - ‘યોગીબાપા’, અને બોલ્યા પણ ખરા - ‘યોગીબાપા દેખાય.’
આ પ્રસંગની સ્મૃતિ કરતાં સેવક સંતે બપોરે ભોજન પૂર્ણ થયા બાદ સ્વામીશ્રીને બાળકના પ્રશ્નનો જવાબ રીતસર આંખો બંધ કરીને લખ્યો હતો તેનું રહસ્ય પૂછ્યું. સ્વામીશ્રી એકદમ સરળતાથી કહે : ‘એમણે કહ્યું હતું કે આંખો બંધ કરો ત્યારે શું દેખાય છે તે લખો.’
બધા હસી પડ્યા.
સ્વામીશ્રી હસતાં હસતાં કહે : ‘આજ્ઞા પાળવાની.’
સંતો કહે : ‘આપે બાળકોની આજ્ઞા પાળી.’
સ્વામીશ્રી મર્મમાં કહે : ‘પછી આપણી આજ્ઞા પાળે.’
કેટલો મોટો સિદ્ધાંત !
મુનિચિંતનદાસ સ્વામીએ પૂછ્યું : ‘આંખો બંધ કરી પછી આપને યોગીબાપા દેખાતા હતા ?’
સ્વામીશ્રી કેફમાં કહે : ‘એ તો ચોવીસ કલાક દેખાય છે.’
યોગીજી મહારાજ બોલ્યા હતા કે ‘અમારે તો અખંડ ભગવાનનું દર્શન છે.’ એવો જ ભાવ સ્વામીશ્રીના ઉત્તરમાંથી પણ ઊપસી આવ્યો.