તા. 11-7-2017, શિકાગો

સ્વામીશ્રીએ સાંજે વૉક આરંભ્યું, સાથે યોગીવાણી ગ્રંથનું શ્રવણ પણ.
એમાં વાત આવી કે ‘પૂછીને વ્યવહાર કરે તે નિર્વાસનિક.’
સ્વામીશ્રી હસીને કહે : ‘એવી રીતે પૂછે ને કે હા જ પાડવી પડે. ગોપીઓના ત્રણ ભેદ છે ને ! તેમાં પ્રૌઢા એકદમ બેસ્ટ. એમ હરિભક્તોના પણ ભેદ છે.’
આગળ વાંચનમાં આવ્યું કે ગઢડા મધ્ય પ્રકરણનું 53મું વચનામૃત વંચાવી યોગીબાપાએ વાત કરી કે ‘ભગવાન અને સંતની અલૌકિક સમજણ કઈ હોય ? તો જીવોના અવગુણ ન જોતાં તેમનો મોક્ષ કરવાની.’
સ્વામીશ્રી કહે : ‘એટલે ખાટી જવાય છે. નહીં તો કિક આઉટ (કાઢી મૂકે).’
એક વાતમાં આવ્યું કે ‘ભગવાનનો ભક્ત ચતુર્ધા મુક્તિ ન ઇચ્છે પણ સેવાને ઇચ્છે. તે સેવા શું ? ભગવાનને અખંડ ધારી રાખવા અને તેમના સંબંધવાળામાં નિર્દોષભાવ રાખવો.’
સ્વામીશ્રી કહે : ‘બંને અઘરું છે પણ એક હોય તો બીજું ઓટોમૅટિક થઈ જાય.’
જ્ઞાનપ્રિયદાસ સ્વામીએ પૂછ્યું : ‘આમાં સંબંધવાળાની વાત આવી તે સંબંધવાળા એટલે શું ? વર્તમાન ધરાવ્યાં હોય તે ?’
સ્વામીશ્રી કહે : ‘વર્ષમાં એક વાર સ્વામિનારાયણ નામ લેતો હોય તેય સંબંધવાળો.’
સંતોએ આશ્ચર્યથી પૂછ્યું : ‘પણ વિમુખ જીવ હોય અને તે સ્વામિનારાયણ નામ બોલે તો ?’
સ્વામીશ્રી કહે : ‘ચોકડી. પ્રેમથી, મહિમાથી બોલે તેની વાત છે.’