તા. 3-7-2017, એટલાન્ટા
આજે સ્વામીશ્રીએ ભોજન કક્ષમાં જ ટ્રેડમીલ પર વૉકિંગ આરંભ્યું ને સાથે યોગીવાણીનો વર્ગ પણ...
એમાં વાત આવી જેમાં યોગીબાપાએ કહ્યું : ‘અને એ સમર્થ કેવા છે. બ્રહ્માંડના જીવોને ચાલવાની, કામ કરવાની વગેરે શક્તિ ભગવાનના પ્રતાપે કરીને પોતે આપે છે.’
આમાંથી સ્વામીશ્રીએ ‘ભગવાનના પ્રતાપે’ એ શબ્દો પર ભાર મૂક્યો. સત્પુરુષ હંમેશાં ભગવાનને પ્રધાન રાખે છે.
બીજી એક વાત આવી કે યોગીબાપા બોલ્યા : ‘શાસ્ત્રીજી મહારાજના વચને એક ઉપવાસ કરે, તો વર્ષીતપનું ફળ મળે.’
સંતોએ પૂછ્યું : ‘સ્વામી ! આવતીકાલે જ શાસ્ત્રીજી મહારાજની આજ્ઞાથી એકાદશીનો ઉપવાસ છે, તો બધાને તે ઉપવાસ કરવાથી 12 મહિનાના ઉપવાસનું ફળ મળશે ને ?’
સ્વામીશ્રી બોલ્યા : ‘કરોડગણું મળશે.’ પછી કહે : “પુરુષોત્તમ બોલ્યા પ્રીતે’માં મહારાજે કહ્યું છે - ‘27મું પાન કે 35મું પાન.’
સંતોને આશ્ચર્ય થયું કે સ્વામીશ્રીને પાના નંબર સહિત વાત યાદ છે ! તરત જ ‘પુરુષોત્તમ બોલ્યા પ્રીતે’ ગ્રંથ લાવવામાં આવ્યો. તે બંને પાનાં ખોલવામાં આવ્યાં. તે બંને પર એકાદશીનો મહારાજે અદ્ભુત મહિમા કહ્યો છે.