મોમ્બાસામાં તા. ૮-૫-૧૯૭૦ના રોજ હરિભક્ત રવિભાઈનાં મકાનનું નામકરણ 'અક્ષરધામ' યોગીજી મહારાજે કર્યું. એનાં નાનાં બોર્ડ પૂજન કરી મકાન બહાર ખોડવામાં આવ્યા હતા. નવીનભાઈ આ ક્ષણોને કેમેરામાં કંડારી રહ્યા હતા. એ વખતે મકાનમાં દાખલ થતાં નાનાં બાળકો સ્વામીશ્રીને કહેવા લાગ્યા, 'બાપા, આજે અમે નિશાળે નથી ગયા. તમે પાટોત્સવમાં આવવાનું કહેલું ને.'
'આજે પાટોત્સવ છે, આપણે તો અક્ષરધામની નિશાળમાં દાખલ થઈ ગયા...' સ્વામીશ્રીએ બાળઠાવકાઈથી ઉત્તર આપ્યો.
'બાપા, તમે બંગલાનું નામ 'અક્ષરધામ' સારું પાડ્યું,' બાળકો સ્વામીશ્રી સાથે વાતે ચઢ્યા.
'અહીં મહિના સુધી સંતો રહ્યા, તે અક્ષરધામ થઈ ગયું. હવે બીજું નામ ન હોય. આ તો અક્ષરધામ બની ગયું...' સ્વામીશ્રીએ બાળકોને બાળશૈલીમાં સમજૂતી આપી. બાળકો રાજીનાં રેડ થઈ ગયાં.
'બાપાએ આપણી સાથે વાતચીત કરી!' - કેટલો આનંદ બાળકોને આવ્યો હશે?