સુવાચારી, તા. ૫-૫-'૫૯
અહીં રાત્રે સભામાં યોગીજી મહારાજ વાતો કરી રહ્યા હતા. એક સ્થાનિક હરિભક્તની વૃત્તિ કથામાં નહોતી. તેઓ કહે, 'ક્યાં વૃત્તિ ગઈ ? સાધુ આવ્યા તે ધર્માદો દેવો પડશે, એમ થતું હશે ? ભાઈ ! પાંચ રૂપિયાની વાત નથી. આ તો આત્યંતિક કલ્યાણ કરવું છે, અભયદાન દેવું છે. રસોઈ લેવા, ધર્માદો લેવા નથી આવ્યા. આ ઝાડ જોવા નથી આવ્યા. (ઝાડ નીચે બિરાજમાન થયા હતા.) જ્યાં સત્પુરુષનાં પગલાં નથી પડ્યાં તે ભૂમિ મસાણ કહેવાય. સત્પુરુષ જીવના કલ્યાણ માટે પધારે છે. રસોઈનો, ધર્માદાનો સ્વાર્થ નથી. એક જીવના કલ્યાણનો સ્વાર્થ છે. આ ઝાડ નીચે બેઠા છીએ તે સંસ્કાર પડ્યા. તે અક્ષરધામમાં જશે. અનાદિ મૂળ અક્ષરમૂર્તિ ગુણાતીતાનંદ સ્વામી વંથળી જતા હતા તે બાવળિયો જોઈને બોલ્યા, 'ક્યાં બાવળિયો ને ક્યાં અક્ષરધામ ! એમ સંસ્કાર લાગે...'
- સાધુ ઈશ્વરચરણદાસ