તા. 26-8-2010, ભાવનગર
પત્રવાંચન કરીને સ્વામીશ્રી આરામમાં જવા ઊભા થઈ રહ્યા હતા. ડૉ. નિકુલ બી.પી. માપી રહ્યા હતા. તેઓ બોલ્યા : ‘leader at 90.’
‘એ શું ?’ સ્વામીશ્રીએ પૂછ્યું.
બ્રહ્મવિહારી સ્વામી કહે : ‘આપ 90 વર્ષની ઉંમરે પણ સંસ્થાનું સંચાલન કઈ રીતે કરી રહ્યા છો ? એ વિષયક પ્રવચન મેં પરદેશમાં કર્યું હતું. એનો ભાવાર્થ એ હતો કે બી.એ.પી.એસ.નું બ્રહ્માંડ અત્યારે એક વ્હીલચૅરમાં સમાઈ ગયું છે અને એ વ્હીલચૅર આજે આખા બ્રહ્માંડમાં છવાઈ ગઈ છે.’
સ્વામીશ્રી કહે : ‘એટલે ?’
બ્રહ્મવિહારી સ્વામી કહે : ‘વ્હીલચૅરમાં બેઠાં બેઠાં સમગ્ર વિરાટ સંસ્થાનું આપ સંચાલન કરો છો.’
સ્વામીશ્રી કહે : ‘આપણે કાંઈ કરતા નથી, મહારાજ બધું કરે છે.’
બ્રહ્મવિહારી સ્વામી કહે : ‘જેમ મહારાજ અક્ષરધામમાં બેઠાં બેઠાં બધું કરે છે એમ....’
અધવચ્ચેથી અટકાવતાં સ્વામીશ્રી આંગળી ઉપર તરફ કરીને કહે : ‘એ ઉપર બેઠા છે એટલે અહીંયાં બધું થાય છે. શ્રીજીમહારાજની જ શક્તિ કામ કરે છે. એમનો સંકલ્પ અને એમનું કાર્ય છે. શાસ્ત્રીજી મહારાજ અને યોગીબાપાની દયાથી બધું ચાલે છે. આપણાથી કાંઈ ન ચાલે. એમની જ શક્તિ, એમનો જ સંકલ્પ, એમનું કાર્ય છે આ બધું....’ આટલું કહીને સ્વામીશ્રી આરામમાં જવા માટે ઊભા થયા.