તા. 16-7-2010, દિલ્હી
એસ્સાર ગ્રૂપના માલિક રવિ રુઇયાના સસરા અને એલ.એમ.એલ. સ્કૂટર ઉદ્યોગના માલિક બાલકૃષ્ણ શ્રિયા દર્શને આવ્યા હતા. તેઓનાં ધર્મપત્ની અત્યંત બીમાર હતાં ત્યારે સારવાર કરવા માટે તેઓને અમેરિકા લઈ ગયા હતા. એ વખતે આપણા સંનિષ્ઠ યુવક સી. જે. પટેલે સ્વામીશ્રીની આજ્ઞાથી ખૂબ સેવા કરી હતી. સ્વામીશ્રીએ પણ એ વખતે બાલકૃષ્ણભાઈને આશીર્વાદ આપ્યા હતા કે ‘આપનાં પત્નીની આવરદા વધી જશે.’ ડૉક્ટરોએ 6 મહિના જ આયુષ્ય કહ્યું હતું, પરંતુ સ્વામીશ્રીના આશીર્વાદથી સાત વર્ષ તેઓ જીવ્યાં.
સ્વામીશ્રીનો આ દિવ્ય અનુગ્રહ તેઓના જીવમાં છે અને એટલે જ સંતો જ્યારે જ્યારે તેઓના શહેરમાં જાય ત્યારે ખાસ બધી જ રીતે તેઓ સહકાર આપતા રહ્યા છે. આજે સ્વામીશ્રીનાં દર્શને આવેલા તેઓએ ભક્તિ વધતી રહે તેવા આશીર્વાદ માગ્યા. સ્વામીશ્રી પ્રસન્ન થયા.