તા. 5-7-2010, દિલ્હી
‘ભારતીય જનતા પાર્ટી’ના રાષ્ટ્રીય પ્રવક્તા અને આજે જ રાજ્યસભાના સભ્ય બનેલા તરુણ વિજયજી સ્વામીશ્રીનાં દર્શને આવ્યા. સ્વામીશ્રીએ હાર પહેરાવીને તેઓને આશીર્વાદ આપ્યા.
તરુણ વિજયજી ગુજરાતી પણ સારું જાણે છે. તેઓ કહે : ‘આજે રાજ્યસભાના સદસ્યનો કાર્યભાર શરૂ થાય છે. તમારા આશીર્વાદ, કૃપા અને સ્નેહ છે જ, એટલે આ બન્યું છે. હું ફક્ત બેમાં જ માનું છું - એક, મારી માતામાં અને બીજા, પ્રમુખસ્વામી મહારાજમાં. હું માનું છું કે આ બધું જ ડિવાઈન પ્લાનિંગ છે કે મેં આજથી રાજ્યસભાનું કાર્ય શરૂ કર્યું ને આજે જ આપનાં દર્શન થયાં. ભગવાનની આ યોજના સમજું છું. આપનાં માર્ગદર્શનમાં રાષ્ટ્રની સેવા કરવા માગું છું. ધર્મ અને રાષ્ટ્રની સેવા કરી શકું એવા આશીર્વાદ આપો અને આ ક્ષેત્રમાં મારી બુદ્ધિ ભ્રષ્ટ ન થાય એવી પ્રાર્થના છે.’
સ્વામીશ્રી કહે : ‘તમારા ઉપર ભગવાનની કૃપા છે જ.’
ખૂબ ભાવવિભોર થઈ તરુણ વિજયજી કહે : ‘આપ એવા આશીર્વાદ આપો કે મને પૈસાની કોઈ લાલચ ન થાય, કેમ કે આ ક્ષેત્ર બહુ ગંદું છે.’
તેઓની આ પ્રાર્થનાથી પ્રસન્ન થતાં સ્વામીશ્રી કહે : ‘वो बड़ी बात है। साधु जैसा जीवन है।’
વાતવાતમાં સ્વામીશ્રીએ એક સૂત્ર આપતાં કહ્યું : ‘આવેશ અને ક્રોધ કમજોરીની નિશાની છે. એનાથી ક્યારેય સફળતા મળતી નથી.’
છેલ્લે સ્વામીશ્રીએ તેઓને માળા આપી અને રોજ ફેરવવા જણાવ્યું.