પત્રવાચન કે લેખનમાં એ મશગૂલ પણ કેવા થઈ જાય છે! અટલાદરામાં પત્ર લખતા હતા એ દરમ્યાન રૂમમાં એક ઊંદરડી પેસી ગઈ. સંતોએ એને પકડવા ખૂબ પ્રયત્ન કર્યો. આ ધમાચકડી દરમ્યાન પ્રમુખસ્વામી મહારાજ તો પત્ર લખતા જ રહ્યા. ઊંદરડી ક્યાં લપાઈ ગઈ તે ખબર જ ન પડી. હજુ તો સંતો તપાસ કરતા જ હતા ત્યાં સ્વામીશ્રીએ પત્ર લખવો પૂરો કરીને હાથ ઊંચા કર્યા અને કહ્યું : 'આ રહી ઊંદરડી !' સ્વામીશ્રીના પેટની, કેડની આજુબાજુએ એ રમી રહી હતી.

ભાવનગરમાં એક રાત્રે જમ્યા પછી સ્વામીશ્રી પત્ર વાંચી રહ્યા હતા. એવામાં બલ્બ-હોલ્ડરમાંથી ગરમ બલ્બ છટકીને સીધો સ્વામીશ્રીની ગરદન ઉપરથી સરીને નીચે પડ્યો. સ્વામીશ્રીએ તો જાણે કંઈ બન્યું જ નથી એમ પત્રવાચન ચાલુ રાખ્યું. પત્ર વાંચીને એ ઊભા થયા એટલે ભદ્રેશ સ્વામીએ આ વાત કરી. સ્વામીશ્રી કહે, 'બલ્બ ક્યારે પડ્યો ?' આવી છે સ્વામીશ્રીની પત્રવાચનમાં એકતાનતા !