તા. 23-10-2016, જામનગર
આજની સ્વાગત-સભાના આશીર્વાદમાં સંપની શીખ આપતાં સ્વામીશ્રીએ કહ્યું હતું કે “પ્રમુખસ્વામી મહારાજે કાંઈ બાકી રાખ્યું નથી. આપણે તો ખાલી હાર પહેરવાનું બાકી છે. પ્રમુખસ્વામી મહારાજને ગમે છે તે કરવાનું. યોગીબાપા કહેતા : ‘સુહૃદભાવ નહીં હોય તો અક્ષરધામમાં ગરવા નહીં દે.’ સંપની બહુ જરૂર છે. સંપથી આ બધું કાર્ય થયું છે. આપણે પોતે સંપ રાખવાનો. સામેવાળા પાસે અપેક્ષા રાખીએ તેમાં ગડબડ થાય. સામેવાળો જો રાખે તો જ હું રાખું (એવું રાખે તો) પત્તો ન પડે. ક્લેશ-અશાંતિ થાય. પણ ‘સંપ માટે હું શું કરું ?’ એવું વિચારો તો સંપ રહે. પ્રમુખસ્વામી મહારાજે સંપ માટે કહ્યું : ‘ખમવું, ઘસાવું, મનનું મૂકવું અને અનુકૂળ થવું.’ આ જ વાતમાં સંપ માટેનું બધું જ આવી જાય છે. (પણ) આપણે જે મનમાં ધાર્યું હોય તે જ કરીએ; સામેવાળાનું જે થવું હોય તે થાય. આપણામાં સંપ છે પણ યોગીબાપા અને પ્રમુખસ્વામી મહારાજના મનમાં જેવો છે તેવો સંપ કરવાનો છે. આપણામાં ભલે સ્વભાવ હોય, પણ એ ભગવાન અને સંત આપણને છોડવાના નથી, આપણે છોડી દઈએ તો ભલે. આપણે જેટલા અનુકૂળ થઈએ એટલો લાભ છે.”