તા. 23-5-2017, અમદાવાદ
આજે સવારે સ્વામીશ્રી યોગી જયંતીની સભામાં લાભ આપવા ઝરૂખે પધાર્યા. આ દિવ્ય પ્રસંગે યોગીગીતાનાં વચનોના આધારે આશીર્વર્ષા કરતાં સ્વામીશ્રીએ જણાવ્યું :
“યોગીબાપા બોલ્યા : ‘હે શાસ્ત્રીજી મહારાજ ! તમારી કસણીમાં હંમેશાં રહેવાય, તમારા શરણમાં રહેવાય એવા ગુણ આપજો.’ ગરજે તો બધા કસણી ખમે છે - ઓશિયાળા થઈને. પણ આ ખુમારીવાળી કસણી. કસણી પડે તો અકળ-વિકળ થઈ જવાય, ફંટાઈ જવાય; પણ આ કસણી એવી કે શરણમાં વધુ ને વધુ જવાય. અહીં કસણીનો અર્થ દેશકાળ કે દેહની કસણીનો નથી, પણ ‘ભક્તોમાં સુહૃદપણું રહે, મન નોખું ન રહે, મનુષ્યભાવ ન આવે, સદા દિવ્યભાવ રહે, તે છે. આ કસણી મોટી છે. જરાક કોઈનો અભાવ આવે તો સુખ-ચેન ન રહે. અંતરમાં બળતરા રહે. તનથી તો આપણે ભેગા રહીએ છીએ, પણ મન નોખાં હોય છે. આ કસણી દેખાય નહીં ને સહેવાય નહીં તેવી હોય છે.”