તા. 19-5-2017, અમદાવાદ

સ્વામીશ્રી ટ્રેડમીલ પર વૉક કરીને ખુરશી પર આરામ કરવા વિરાજ્યા એટલે વાર્તાલાપ શરૂ થયો.
ડૉક્ટર વી. પી. પટેલે પૂછ્યું : ‘અક્ષરબ્રહ્મ એક ડગલું ભરે તો કેટલાં બ્રહ્માંડ પસાર થઈ જાય ?’
સ્વામીશ્રી કહે : ‘અનંત.’
ડૉક્ટર કહે : ‘આ અક્ષરની વાત એટલી મોટી છે કે વિચારીએ તો ‘અહો ! અહો !’ સરખું રહે, અને સમજાય તો અખંડ આનંદના સમુદ્રમાં ઝીલતા રહીએ... પણ
એ તો આપ દયા કરો તો જ ઓળખાય ને ?! કારણ કે આપ કૃપાસાધ્ય છો, ક્રિયાસાધ્ય નહીં.’
સ્વામીશ્રીએ હા કહી. પછી ઉમેરતાં કહે : ‘ઘણી વાર ભેગા હોય તોય ન ઓળખાય. કેટલાય સંતો સ્વામી (ગુણાતીતાનંદ સ્વામી) પાસે રહેતા, પણ ન ઓળખ્યા અને ભગતજી મહારાજ ઓળખી ગયા. પાછળ ચાલવાની ના પાડી કે ‘સ્વામીની ગોદડીમાંથી કરોડો સૂર્યનું તેજ નીકળે છે.’
ડૉક્ટર કહે : ‘નજીક રહેતા હોય ને તે ન ઓળખે તેને તો મોટી ખોટ કહેવાય, કારણ કે તેને તો ઓળખવાનો ચાન્સ મળ્યો.’
સ્વામીશ્રી કહે : ‘સ્વામીએ કહ્યું છે ને - જાદવ તો નિરંતરના અભાગિયા...’
સ્વામીશ્રી જાણે મર્મમાં કહી રહ્યા હતા કે તમને પણ મોટી પ્રાપ્તિ થઈ છે પણ યાદવો જેવું ન થાય તે ધ્યાન રાખજો.