તા. 27-12-2010, મુંબઈ
સ્વામીશ્રી ભોજન અંગીકાર કરી રહ્યા હતા. એ દરમ્યાન બલરામ ભગતે શ્રીજીમહારાજે હળવદમાં બેસીને ત્રણ મણ સાકર આરોગી એ પ્રસંગની વાત કરીને કહ્યું : ‘આપ પણ મહારાજનું સ્વરૂપ છો, તો આપ પણ કંઈક વધારે જમો.’
સ્વામીશ્રી તરત જ કહે : ‘એ તો ભગવાન હતા. એટલે થોડામાંથી મોટું કરે અને મોટામાંથી થોડું પણ કરી શકે. એ કરે એ આપણાથી ન થાય.’
કૃષ્ણવલ્લભ સ્વામી કહે : ‘બીજું બધું ભલે પડ્યું રહે, પણ જે ખીચડી છે એ તો જમી જાવ.’
બલવીર ભગત કહે : ‘મહારાજને આવું કહેવું નહોતું પડતું.’
બલરામ ભગત કહે : ‘મહારાજ તો હરિભક્તોના મનોરથ પૂરા કરતા હતા.’
સ્વામીશ્રી કહે : ‘એ તો ભગવાન હતા ને ! ભગવાન તો બધું કરી શકે.’
બલરામ ભગત કહે : ‘એ જ શ્રીજીમહારાજ આપમાં વિરાજમાન છે, તો આપ પણ એવું કરો ને !’
સ્વામીશ્રી કહે : ‘બધું એમની ઇચ્છા પ્રમાણે થાય છે.’
આટલું કહીને ગોળી ગળતાં ગળતાં સ્વામીશ્રી કહે : ‘ખીચડી ક્યાંથી જાય ? આ ગોળીઓ લેવામાં જ પેટ ભરાઈ જાય છે.’