તા. ૮-૨-'૮૬ના રોજ સારંગપુરમાં સંતોએ પ્રશ્નોત્તરી સ્વામીશ્રી સાથે ગોઠવેલી તેમાં એક પ્રશ્ન એવો પૂછ્યો કે, 'શ્રીજીમહારાજનું કર્તાપણું આપ કઈ રીતે સમજી શકો છો?'
સ્વામીશ્રી કહે : 'એ તો બધાએ સમજવાનું છે, કારણ કે આપણે કર્તા જ નથી પછી શું ? મહારાજે કહ્યું છે ને કે 'મારી મરજી વિના રે કોઈથી તરણું નવ તોડાય...' શ્રીજીમહારાજ વિના પાંદડું હલવા સમર્થ નથી. એ હકીકત છે. પછી આપણે ખોટો અહં કરીએ કે મેં કર્યું, મારાથી થયું એ તો નકામો મિથ્યાવાદ છે. આપણે ગમે તેટલાં મોટા થઈએ પણ ભગવાન આગળ દાસ જ છીએ. ભગવાન જેટલાં ઐશ્વર્ય પામે તોય ભગવાનના દાસ જ છીએ. આપણું જ્ઞાન, આપણો સિદ્ધાંત આપણને એ જ શીખવે છે. સેવક થઈને હાથ જોડીને જ કામ કરવાનું છે. આપણાથી કંઈ થઈ શકવાનું નથી. લાખો ને કરોડો ભેગા થયા હોય તોય શું ? આપણે ગમે તેટલું આયોજન કરીને બેઠા હોઈએ પણ એની મરજી ન હોય તો ક્યાંયનું ક્યાંય ઊડી જાય...'
સ્વામીશ્રીએ ભગવાનના કર્તાપણાનો ગહન સિદ્ધાંત કેટલો સરળ અને સહજતાથી જીવનમાં ચરિતાર્થ કર્યો છે !