તા. 4-12-2010, મુંબઈ
મુંબઈ પધાર્યા પછી સ્વામીશ્રી પહેલી વખત નવા બંધાયેલા ઉતારામાં પધારી રહ્યા હતા. તેરમે માળે સ્વામીશ્રીનો ઉતારો હતો.
રાત્રે 9:40 વાગે વિખ્યાત કાર્ડિયોલોજિસ્ટ ડૉ. અશ્વિનભાઈ બી. મહેતા સ્વામીશ્રીને તપાસવા માટે આવ્યા. તેઓ કોલકાતા હતા અને સ્વામીશ્રીને તપાસવા માટે જ વહેલી ફ્લાઇટ લઈને આવ્યા હતા. આજે તેઓને ઝાડા જેવું હતું, છતાં ન ગણકારીને ખાસ સ્વામીશ્રી માટે જ તેઓ આવ્યા હતા. સ્વામીશ્રી પાસેથી આખો ઘટનાક્રમ સાંભળ્યા પછી સ્વામીશ્રીને પલંગ ઉપર સુવડાવવામાં આવ્યા અને સુવડાવીને બધી જ તપાસ કરીને બહાર પધારીને થોડોક વિમર્શ કર્યા પછી પુનઃ તેઓ સ્વામીશ્રી પાસે આવ્યા ને સ્વામીશ્રીને કહે : ‘ચિંતાજનક કશું નથી. કાલે થોડાક ટેસ્ટ કરી લઈશું, પછી ખબર પડશે કે આગળ શું કરવું છે. અત્યારે ખાલી એક ગોળી બદલીશું એટલે વાંધો નહીં આવે.’
સ્વામીશ્રી થોડાક આર્દ્રભાવે કહે : ‘તમને વારે વારે હેરાન કરીએ છીએ.’
આ સાંભળતાં જ અશ્વિનભાઈ એકદમ ગળગળા થઈ ગયા અને કહે : ‘બાપા ! એમાં હેરાન કરવાની વાત જ ક્યાં છે ? આ તો અમારી ફરજ છે. અને અમને આપ સેવા આપો છો.’
તેઓ આગળ કંઈ બોલી ન શક્યા. બહાર નીકળ્યા પછી યોગીચરણ સ્વામીને કહે : ‘બાપા બાળક જેવા નિર્દોષ છે.’