તા. 14-12-2010, મુંબઈ
આૅસ્ટ્રેલિયા ખંડ અને એશિયા પેસિફિક વિસ્તારમાં વિચરણ કરી રહેલા જ્ઞાનપુરુષ સ્વામી તથા આદર્શમુનિ સ્વામી આજે આવ્યા હતા. સંસ્થાનાં અંગ્રેજી પ્રકાશનો લઈને તેઓ સ્વામીશ્રીની પ્રસાદીનાં કરવા માટે આવ્યા. સ્વામીશ્રીએ એ પુસ્તકનાં બે-ત્રણ પાનાં બે-ત્રણ વખત ફેરવ્યાં, જેમાં આગળના પાના ઉપર મહારાજ-સ્વામી તથા પાછળના પાના ઉપર સ્વામીશ્રીનો ફોટો અને પરિચય હતો. આ સંદર્ભમાં સ્વામીશ્રી કહે : ‘શાસ્ત્રીજી મહારાજ અને યોગીજી મહારાજનો ફોટો આવવો જોઈએ ને !’ આટલું કહીને જાતે જ દેખાડવા લાગ્યા : ‘અક્ષરપુરુષોત્તમ મહારાજની બાજુમાં અથવા પાછળ શાસ્ત્રીજી મહારાજ અને યોગીજી મહારાજ છાપવા જોઈએ, હવે આ બધું નીકળી ગયું. પરદેશના છોકરાઓને શું ખબર પડે કે શાસ્ત્રીજી મહારાજ અને યોગીજી મહારાજ કોણ થઈ ગયા ?’
સ્વામીશ્રીએ ઘણી વખત આ ટકોર કરેલી છે.
વળી, વાત નીકળતાં રૂડા સ્વામી કહે : ‘મેં તો મોટામાં મોટી સંપત્તિની ખાણ શોધી રાખી છેે, આપ.’
સ્વામીશ્રી તરત જ હસતાં હસતાં કહે : ‘આપણે તો ભઈ ! લૂખાસૂખા છીએ.’
આદર્શમુનિ સ્વામી કહે : ‘લક્ષ્મી તો સંતની દાસી કહી છે ને !’
સ્વામીશ્રી કહે : ‘એ તો મહિમાની વાત છે. આપણે તો કથાવાર્તા, ભજન કરીને સત્સંગ, નિષ્ઠા, હરિભક્તોમાં દૃઢ થાય અને એનાથી સેવા થાય એ કરવાનું છે.’
જ્ઞાનેશ્વર સ્વામી કહે : ‘આપ દૃષ્ટિ કરો.’
સ્વામીશ્રી કહે : ‘મહેનત કરે તો દૃષ્ટિ થાય.’