તા. 14-12-2010, મુંબઈ
પ્રાતઃપૂજા પછી ભોજન દરમ્યાન અગવડ-સગવડોની વાતો થતી હતી. સ્વામીશ્રીની કૃપાથી સંતોને અત્યારે કેવી સગવડ છે, એ વાતો પણ નીકળી. યજ્ઞેશ્વર સ્વામી આજે મુંબઈ આવ્યા હતા, તેઓને લેવા માટે મંદિરેથી ગાડી ન આવતાં ટેક્સીમાં આવવાનું થયું હતું.
એ સંદર્ભમાં સ્વામીશ્રી હળવા મૂડમાં તેઓને કહે : ‘તમને ખોટું નહોતું લાગ્યું ને ?’
આદર્શજીવન સ્વામી કહે : ‘આપ એવી રીતે વર્તી ગયા છો કે કોઈ પણ પ્રસંગમાં કોઈને ખોટું લાગવાનો પ્રશ્ન જ નથી. આપે પણ આવી જ રીતે ગાડાંમાં અને ચાલતાં મુસાફરી કરેલી છે.’
સ્વામીશ્રી કહે : ‘આપણે તો ક્યાં, આપણા કરતાં આપણા ગુરુઓએ કેવાં દુઃખો સહન કર્યાં છે ? આપણે તો થોડું અગવડ-સગવડ પડે, પણ એમણે તો અગવડોમાં જ કામ કર્યું છે.’
જ્ઞાનવત્સલ સ્વામી કહે : ‘એ વખતના જમાનામાં એમને તો વ્યવસ્થા હતી જ નહીં અને આપને તો વ્યવસ્થા હતી છતાં આપે અગવડો વેઠી સહન કર્યું છે.’
આદર્શજીવન સ્વામી કહે : ‘એ વખતે તો વિચરણ પણ મર્યાદિત હતું, પરંતુ આપે અગવડો વેઠીને આખી દુનિયામાં વિચરણ કર્યું છે.’
સ્વામીશ્રી કહે : ‘શાસ્ત્રીજી મહારાજ, યોગીજી મહારાજ પણ આખી દુનિયામાં ફર્યા છે, માથે પોટલાં મૂકીને ફર્યા છે.’
આદર્શજીવન સ્વામી કહે : ‘કોઈને ખાવામાં પ્રશ્ન થાય તોય આપના જીવનમાંથી સમાધાન મળી રહે, વાહનમાં પણ અગવડ-સગવડોમાં પ્રશ્ન ન રહે. કોઈ પણ પ્રસંગમાં ધોખો લાગવાનું રહે જ નહીં.  બધા જ પ્રશ્નોનું સમાધાન આપના જીવનમાંથી જ મળી જાય છે.’
સ્વામીશ્રીએ જાણે એ કશી જ વાત સાંભળી ન હોય તેમ પોતાના ગુરુવર્યોના ગુણગાનમાં જ રત રહ્યા.
અંતે તેઓ કહે : ‘શીખવાનું એ જ છે. મોટાપુરુષ કરી ગયા તો એ પ્રમાણે આપણે વર્તવાનું. શાસ્ત્રીજી મહારાજ અને યોગીજી મહારાજના વખતમાં મુશ્કેલીઓ કેટલી બધી હતી ? ગાડામાં ફરવાનું, ચાલતાં જવાનું અને ત્યાં જઈને રસોઈ પણ જાતે જ કરવાની, અને હરિભક્તોની રસોઈ પણ સાથે કરવાની જ હોય, છતાં એમણે સૌને રાજી કર્યા છે, એમ આપણે પણ વર્તવાનું.’