તા. 9-4-2017, કમ્પાલા
આજે સ્વામીશ્રીનો અલ્પાહાર પૂર્ણ થયો એટલે સેવક સંતે થાળ લગભગ ઉપાડી જ લીધો હતો. ત્યાં સ્વામીશ્રીએ ટેબલના ખૂણા પર પડેલા ફાફડા તરફ નિર્દેશ કરતાં કહ્યું : ‘આ બાકી રહી ગયું.’
સૌને આશ્ચર્ય થયું, કારણ કે સ્વામીશ્રી ક્યારેય સામેથી કોઈ પણ વાનગી જમવાની રુચિ બતાવતા નથી. આજે સ્વામીશ્રીએ સામેથી રુચિ બતાવી તેથી સૌ રાજી થયા. સ્વામીશ્રી થોડોક ફાફડો જમ્યા.
એટલામાં પ્રદીપભાઈ અંદર આવ્યા ત્યારે ગુણવત્સલદાસ સ્વામીએ રહસ્ય સ્ફોટ કરતાં કહ્યું : “હું થાળ લઈને અંદર આવતો હતો ત્યારે પ્રદીપભાઈએ મને કહેલું - ‘માલિક(સ્વામીશ્રી)ને ફાફડા જમાડજો.’ આપે તેમનો સંકલ્પ પકડ્યો અને સામેથી માંગીને ફાફડો અંગીકાર કર્યો.”
પ્રદીપભાઈ તો આ વાત સાંભળીને ગળગળા થઈ ગયા. અને તેમાંય વળી, સ્વામીશ્રીએ સ્વહસ્તે પ્રદીપભાઈને તે ફાફડાનો પ્રસાદ આપ્યો અને તેમના દેખતાં પોતે પણ ફરી વાર જમ્યા. પ્રદીપભાઈની આંખોમાં ભાવ-અશ્રુ વહી આવ્યાં.