તા. 8-4-2017, કમ્પાલા

આજે સ્વામીશ્રીના મુંડન દરમ્યાન વાગી જવાના કડવા અનુભવોની વાતો નીકળી.
સ્વામીશ્રી કહે : ‘અમારેય એવું થયું હતું - ધર્મજમાં. એક ડોસો હતો તે અમારી પાસે આવ્યો. શિયાળાનો સમય હતો. સવારના 4-30 વાગ્યા હતા, તેના હાથ ધ્રૂજે...’
સંતો કહે : ‘તો પછી મુંડન થયું હતું ?’
સ્વામીશ્રી હસીને કહે : ‘આઠ કાપા.’ એટલે કે એ મુંડન દરમ્યાન આઠ કાપા પડ્યા હતા.
સંતો કહે : ‘ઓહોહો...’
સ્વામીશ્રી કહે : ‘રેકૉર્ડ સત્તર કાપાનો છે - સારીંગમાં.’
તેનું કારણ જણાવતાં કહે : ‘સોળ સંતો પછી આપણો વારો આવે ને ? ત્યારે અસ્ત્રો બુઠ્ઠો થઈ ગયો હોય !’
વિચાર આવી ગયો કે સત્પુરુષે આવું તો કેટકેટલુંય સહન કરી લીધું હશે ! કોઈકને રાજી કરવા, કોઈકના ભાવ પૂરા કરવા અને વધુ તો આપણને સૌને સમજાવવા કે ‘ભાઈ ! જીવનમાં સહન કરવાનું આવશે.’