તા. 13-12-2010, મુંબઈ
આજના સ્વામીશ્રીના જન્મદિવસે સ્વામીશ્રી શું કરતા હતા ? સૌની ભાવના હતી કે આજે તો સ્વામીશ્રીને જે ગમતું હોય એ કરે, પરંતુ સ્વામીશ્રી તો સતત મિટિંગમાં વ્યસ્ત હતા. વળી, આજના જન્મ-દિવસની શુભેચ્છા પાઠવવા અને આશીર્વાદ મેળવવા માટે અનેક હરિભક્તોના દેશ-વિદેશથી ફોન આવતા હતા. ચાલુ મિટિંગે પણ સૌની ભાવનાને સ્વામીશ્રી સ્વીકારતા હતા. વળી, વચ્ચે કોઈક હરિભક્તોના જીવનના પ્રશ્નોમાં પણ ફોન દ્વારા આશીર્વાદ અને માર્ગદર્શન આપતા જતા હતા.
આ સંદર્ભમાં બ્રહ્મવિહારી સ્વામી કહે : ‘આપનું તો વિશિષ્ટ વ્યક્તિત્વ છે. મિટિંગ પણ ચાલતી જાય અને વચ્ચે વચ્ચે ફોન પણ આવતા જાય, બધું જાહેર.’
સ્વામીશ્રી હળવાશથી તેઓના ફોનની સામે દૃષ્ટિ કરતાં કહે : ‘આમાંથી પણ આવે જ છે ને !’
બ્રહ્મવિહારી સ્વામી કહે : ‘કોઈ આૅફિસ નહીં, કબાટ નહીં, થેલો નહીં, ‘આ કાગળ મારો છે ને રાખજે’ - એવું અંગત કશું જ નહીં.’
સ્વામીશ્રી કહે : ‘અમારું તો દેશી તંત્ર, આમ જ હાલવાનું. આમ ને આમ મહારાજની દયાથી આખી સંસ્થા વિકસી ગઈ.’