તા. 12-12-2010, મુંબઈ
આજે સ્વામીશ્રીનું ભ્રમણ પુનઃ શરૂ થતું હતું. લગભગ 30મી તારીખ પછી સ્વાસ્થ્યને ધ્યાનમાં રાખીને ભ્રમણ બંધ કરાવવામાં આવ્યું હતું. આજે ડૉ. અશ્વિનભાઈ મહેતાની નજર હેઠળ આ વૉકિંગ શરૂ કરવાનું હતું, પરંતુ અશ્વિનભાઈનું સ્વાસ્થ્ય થોડુંક સારું ન હોવાથી ઉપસ્થિત રહી ન શક્યા, છતાં આજે સ્વામીશ્રીને ભ્રમણ કરાવવામાં આવ્યું. સૌથી પહેલાં પાંચ મિનિટ અને ત્યારપછી વિશ્રમ પછી સાતેક મિનિટનું ભ્રમણ થયું. પ્રમાણમાં સ્વાસ્થ્યની રીતે સઘળું સંતોષકારક હતું. સૌએ આનંદથી આ પ્રસંગને વધાવ્યો.
આરામમાં જવાનો સમય થયો ત્યારે બ્રહ્મવિહારી સ્વામી કહે : ‘કાલે મળીએ.’
સ્વામીશ્રી કહે : ‘કેમ કાલે ?’
બ્રહ્મવિહારી સ્વામી કહે : ‘કાલે સારો દિવસ છે ને !’ (સ્વામીશ્રીના જન્મદિવસના સંદર્ભમાં તેઓએ કહ્યું.)
સ્વામીશ્રી કહે : ‘અમારે તો ટ્વેન્ટીફોર અવર સારા જ છે. ભગવાન મળ્યા અને સંત મળ્યા, એમનાં દર્શન થયાં એટલે સારા જ દિવસો છે.’
બ્રહ્મવિહારી સ્વામી કહે : ‘તો રાજી રહેજો.’
સ્વામીશ્રી કહે : ‘રાજીપો આજે જ રાખવાનો ? આવતીકાલે નહીં ? પરમ દિવસે નહીં ? કાયમ નહીં ? રાજીપો તો કાયમનો રાખવાનો, ટ્વેન્ટીફોર અવર.’
સ્વામીશ્રીએ અદ્ભુત વાત કરી દીધી.