તા. 14-3-2010, સારંગપુર
મંદિરની રૂપચોકીમાં દર્શન કરવા માટે સ્વામીશ્રી પધાર્યા ત્યારે અહીં બેઠેલા સંતો ચોસઠપદીનું પદ ગાઈ રહ્યા હતા : ‘માનો મળી છે મોટી વાત, હાથ આવી તે મા હારજો રે...’
‘મોટી વાત’ એ શબ્દને ધ્યાનમાં રાખીને સ્વામીશ્રીએ બે હાથ પહોળા કરીને પૂછ્યું : ‘કેટલી મોટી ?’
આ સાંભળીને સામે બેઠેલા વિરાટસ્વરૂપ સ્વામી કહે : ‘હવે તો નાનું થઈ ગયું છે. (તેઓએ ડાયટિંગ કરીને શરીરને પાતળું કરી દીધું હતું, એ સંદર્ભમાં તેઓએ વાત કરી).
આ સાંભળીને સ્વામીશ્રી તરત જ કહે : ‘શરીરની વધઘટ તો થાય. એ તો પાતળું કરવાનું છે, સારું છે, પણ મહારાજ-સ્વામી, શાસ્ત્રીજી મહારાજ, યોગીજી મહારાજ મળ્યા, આ સત્સંગ મળ્યો, એ મોટી વાત છે. એને મૂકવા નહીં, બીજાને મૂકી દેવા.’