લંડનમાં ચાલતી એક સદ્‌પ્રવૃત્તિનું નામ છે 'લેન્ડ માર્ક ફોરમ' - આ સંસ્થા પોઝીટીવ એટીટ્યુડ - સવળો વિચાર કરતા શિખવાડીને માણસને આગળ વધારવાની પ્રવૃત્તિ કરી રહી છે. સંસ્થાના ચૅરમૅન જ્હોની ટેનન આજે ખાસ સ્વામીશ્રીનાં દર્શને આવ્યા હતા. વિશ્વમાં ૫૦ જેટલાં સેન્ટરો ચલાવતી આ સંસ્થાની પ્રવૃત્તિથી તેઓએ સ્વામીશ્રીને વાકેફ કર્યા.
સ્વામીશ્રીએ સામે પ્રશ્ન કરતાં પૂછ્યું : 'આ સંસ્થા વ્યસન મુકાવે છે?'
જ્હોની ટેનન સંતોષદાયક જવાબ આપી ન શક્યા. વાતને વાળવા માટે તેઓએ ઉત્તર આપતાં કહ્યું : 'સવળો વિચાર કરે તો એ થાય પણ ખરું. મૂળ તો માણસની ક્ષમતા વધારે ને વધારે પાંગરે એ માટેના અમે પ્રયત્નો કરીએ છીએ.'
સ્વામીશ્રી કહે : 'ક્ષમતા એમ ને એમ ઓછી પાંગરે? પાંગરવાનું મૂળ તો વ્યસનમુક્તિ છે. પાયામાંથી જ એ જો હોય તો જ માણસ સારી રીતે કામ કરી શકે.' જ્હોની પાસે સ્વામીશ્રીની આ દલીલનો કોઈ ઉત્તર ન હતો.
(૩૦-૪-૨૦૦૪, લંડન)