તા. 24-10-2010, ગોંડલ
સ્વામીશ્રી ભોજન અંગીકાર કરી રહ્યા હતા એ દરમ્યાન સુરતથી આવેલા વાસુદેવ સ્વામીએ સુરતના હીરા ઉદ્યોગની વિશેષતાની વાતો કરી. વાતો પૂરી થયા પછી તેઓ કહે : ‘અમને બધાને પણ એક હીરો મળ્યો છે. એ હીરો અમૂલ્ય છે.’
આટલું કહીને તેમણે સ્વામીશ્રીને પૂછ્યું : ‘આપને ખબર છે, એ હીરો કોણ છે ?’
સ્વામીશ્રી તરત જ કહે : ‘યોગીજી મહારાજ.’
વાસુદેવ સ્વામી કહે : ‘અમે તો એમને ક્યાં જોયા છે ?’
સ્વામીશ્રી કહે : ‘મૂર્તિમાં રહ્યા જ છે ને ! ને તમારા બધામાં પણ એ જ છે ને ! અંતર્દૃષ્ટિ કરે તો દેખાય, બાકી શ્રીજીમહારાજને તો ક્યાં જોયા છે ? પણ જ્ઞાન થાય તો દેખાય.’
વૈરાગ્યપ્રિય સ્વામી કહે : ‘યોગીબાપા કહેતા કે પ્રમુખસ્વામી અમારો કોહિનૂર હીરો છે.’
વાસુદેવ સ્વામી કહે : ‘યોગીબાપાએ જે કહ્યું છે એ તો અમારે માનવાનું જ ને !’
સંતોએ જ્યારે યોગીજી મહારાજનો તર્ક રજૂ કર્યો, ત્યારે સ્વામીશ્રી મૌન રહ્યા.
વૈરાગ્યપ્રિય સ્વામી કહે : ‘અમને જે હીરો મળ્યો છે, એ હીરાનો વેપાર સારામાં સારો થાય એવા આશીર્વાદ આપજો.’
સ્વામીશ્રી કહે : ‘થાય જ છે ને ! શાસ્ત્રીજી મહારાજનો સંગ ઝાલ્યો છે, તો એ પકડી રાખવો. યોગીબાપાએ દેશ-વિદેશમાં ખૂબ વિકાસ કર્યો છે. એના આધારે આપણે ફરીએ, એટલે બધું ચાલે.’