તા. 22-10-2010, ગોંડલ
સ્વામીશ્રી પત્રવાંચન કરી રહ્યા હતા. 5:25 વાગ્યા પછી તો સ્વામીશ્રીનું મન શરદ પૂર્ણિમાની સભામાં જવા માટે પહોંચી ગયું હતું. અનંતચરણ સ્વામીને બોલાવીને કહ્યું : ‘કૃષ્ણવલ્લભને કહી દો કે સભામાં જવાનું છે તો વહેલા જમી લઈશું.’
આટલું કહી સભાનો કાર્યક્રમ મંગાવ્યો. સ્વામીશ્રીએ એ કાર્યક્રમ જોયો. અનંતચરણ સ્વામી કહે : ‘નારાયણમુનિ સ્વામીએ કહેવડાવ્યું છે કે 8:00 વાગે સ્વામીશ્રી પધારશે તો ચાલશે.’
આ સાંભળતાં સ્વામીશ્રી કહે : ‘એ બધું તું રહેવા દે. ક્યારે પધારવાનું પૂછવા માટે ઓછો મોકલ્યો હતો ? સભા ક્યારે ચાલુ થાય છે એ જ મારે જાણવું છે.’
6:45 વાગે સભા ચાલુ થતી હતી. સ્વામીશ્રી કહે : ‘અત્યારે વૉક લઈ લઈએ ને પછી જમી લઈએ, એટલે 7:00 વાગે પહોંચી જવાય.’
યોગીચરણ સ્વામી કહે : ‘બહુ વહેલું થશે. 7:00ને બદલે 7:15 વાગે રાખજો.’
સ્વામીશ્રી કહે : ‘વહેલા જઈને બેસીએ તેમાં વાંધો શું છે ?’
એમ કહેતાં સ્વામીશ્રીએ ભોજનની ઉતાવળ કરવાનું કહી દીધું અને 5:45 વાગે ભૂમિભ્રમણ કરવા માટે ઊભા થઈ ગયા, 6:45 વાગે ઠાકોરજી જમાડવા વિરાજી ગયા.
પ્રત્યેક સત્સંગ સભા કે કથાના પ્રસંગમાં સમયસર પહોંચવાનો તેઓનો આગ્રહ સૌને માટે ખૂબ પ્રેરણાદાયક છે.