તા. 23-9-2010, સારંગપુર
એક યુવકનો પત્ર હતો : એક છોકરી સાથે એને પ્રેમ હતો, પણ છોકરીએ દગો દીધો અને એને છોડી દીધો હતો. પત્રમાં એણે લખ્યું હતું કે ‘મને એ જ છોકરી પાછી મળે એવા આશીર્વાદ આપો. અત્યારે તો વ્યસની થઈ ગયો છું.’
સ્વામીશ્રીએ એ યુવકને ફોન જોડાવ્યો અને સમજાવતાં કહ્યું : ‘અત્યારથી જે થયું તે સારું જ થયું. આટલેથી જ પતી ગયું. લગ્ન થયાં પછી જો આ રીતે દગો કર્યો હોત તો મોટી મુશ્કેલી આવત.’
પછી સ્વામીશ્રી કહે : ‘પૂજા ને તિલક-ચાંદલો કરજે તો ખોટું કામ કરતાં શરમ આવશે. ‘આપણાથી આવું ન થાય’ - એવું મનમાં થશે. તિલક-ચાંદલો હશે તો વ્યસન પણ છૂટી જશે.’
યુવક કહે : ‘એને હું ભૂલી શકતો નથી.’
સ્વામીશ્રી કહે : ‘પ્રાર્થના કરીશું, બધું ભુલાઈ જાય ને શાંતિ મળે.’