તા. 4-3-2010, સારંગપુર
ગયા વખતના ઓછા વરસાદના કારણે અહીંનું યજ્ઞપુરુષ સરોવર ખાલી પડ્યું હતું, તળિયું દેખાઈ રહ્યું હતું. આ સંદર્ભમાં સંતોએ સ્વામીશ્રીને વિનંતી કરતાં કહ્યું : ‘અહીંનો ડેમ ભરાય ત્યાં સુધી આપ અહીં રહો. ડેમ ભરાશે તો આ સંતોરૂપી ગુલાબ અને મોગરા ખીલી જશે અને લીલા રહેશે.’
સ્વામીશ્રીએ આ જ વાતને આધ્યાત્મિક વળાંક આપતાં કહ્યું : “પાણી વગર પણ લીલા રહે એવું કરો ને ! માન-અપમાનમાં એકતા રાખતા શીખે, અખંડ આનંદમાં હોય, ‘જ્યાં જુઓ ત્યાં રામજી, દૂસરો ન ભાસે રે...’ એવું રહે તો લીલું-સૂકું થાય જ નહીં.”
હરિપ્રકાશ સ્વામી કહે : ‘આપ આશીર્વાદ આપજો તો આવી સ્થિતિ થાય.’
‘આશીર્વાદ કેટલા આપવા ?’
‘અમે તો જીવ છીએ, પણ આપની પાસે આવ્યા છીએ તો એવી સ્થિતિ કરી દેજો.’
સ્વામીશ્રી કહે : ‘જીવનમાં ભક્તિ દૃઢ કરવી. માન-અપમાન, સુખ-દુઃખ બધાંમાં શાંતિ શાંતિ રહે. એવી સ્થિતિ થાય તો પછી કહેવું જ ન પડે. દરેકનો મહિમા સમજાય, કથાવાર્તા - ભજન-કીર્તન - સેવા થાય એ રીતે જીવન કરવું.’