બોચાસણમાં એક રવિવારની સવારે યુવક મંડળની સભામાં બોચાસણના ઉત્સાહી યુવક ચીમનભાઈ માસ્તર પાસે યોગીજી મહારાજે કીર્તન ગવરાવ્યું. આનંદ-ઉત્સાહની છોળો ઊડાડતા એમની ગાવાની પદ્ધતિથી સ્વામીશ્રી બહુ રાજી થતા. એક કીર્તન પૂરું થયું એટલે કીર્તનભક્તિમાં તાળી પાડતા-બ્રહ્માનંદનો તાલ મિલાવતા સ્વામીશ્રી પોતાની લાક્ષણિક શૈલીમાં બોલ્યા : 'બીજું... ત્રીજું...' - એમ ત્રણ કીર્તન ગવરાવ્યાં. કીર્તન-ભક્તિનો અનેરો આનંદ, સ્વામીશ્રીએ પોતાની મૂર્તિનું સુખ આપતા, સૌને લૂંટાવ્યો.
સભા પૂરી થતા સ્વામીશ્રી પોતાનાં ઉતારામાં પધાર્યા યુવાન સંતો-ભક્તો સ્વામીશ્રીને વીંટળાઈને બેઠા હતા, ચરણ ચાંપતા હતા ત્યાં સ્વામીશ્રી કહે, 'મને કીર્તન-ભક્તિ પહેલેથી જ બહુ પ્રિય. એ મારું અંગ. કોઈ કીર્તન ગાય તો પણ મને તેમાં આનંદ આવે.' આવી રીતે સ્વામીશ્રી ઘણીવાર પોતાની વાત કરતા સૌને નિર્દોષભાવમાં તાણી જતા.