તા. 12-2-2017, સારંગપુરથી વિદ્યાનગર જતાં ગાડીમાં
એક સાધકને સાધુ થવા માટે માતા-પિતા તરફથી રજા મળી ગઈ હતી, પણ અન્ય સંબંધીઓને હજુ થોડી અવઢવ રહેતી હતી. સ્વામીશ્રી જ્યારે સારંગપુરથી વિદ્યાનગર જતા હતા ત્યારે તેઓએ આ પરિવાર ઉપર ફોન દ્વારા અદ્ભુત પ્રેરણા-વચનો વરસાવ્યાં હતાં :
“શ્રીજીમહારાજે કહ્યું છે કે આપણે અનંત જન્મ લીધા છે. સાચી વાત છે કે ખોટી ? એટલે અનંત જન્મનાં અનંત મા-બાપ થયાં. તમારી બા તમારી દીકરી હશે, સાસુ હશે, ગમે તે હશે... અનંત જન્મથી આપણે ઊલટ-સૂલટ બધાં રિલેશન બાંધ્યાં છે. એ જો ખોટું હોય તો બોલો. એટલે એ અનંત જન્મનાં સગપણ બધાં ખોટાં અને શ્રીજીમહારાજે કહ્યું કે ‘સગપણ હરિવરનું સાચું, બીજું સર્વે ક્ષણભંગુર કાચું.’ આ વાત જો સાચી હોય તો વિચારવું કે નહીં ? એટલે આપણે તો ભગવાનનાં ચરણે અર્પી દેવો. અને ભગવાન પ્રગટ છે, ન હોત તો બરાબર. પરોક્ષમાં આપવાની વાત અને ભગવાન પરોક્ષ હોય તો વાત જુદી, પણ પ્રગટ છે; એટલે જો એમનામાં મનુષ્યભાવ આવે કે ‘આ મનુષ્ય છે’ તો વાત થઈ રહી - પ્રગટ મળ્યા તે ન મળ્યા, કોઈ વાત ન રહી. એટલે આપણે તો સમજીને સમજણ રાખવી.”
સ્વામીની વાત યાદ આવી ગઈ : ‘બાપના હૈયામાં સ્ત્રી છે તે છોકરાને પરણાવે છે ને સાધુના હૈયામાં ભગવાન છે, તે જીવના હૈયામાં ઘાલે છે.’