ન્યૂયોર્કમાં આજે સ્વામીશ્રીની પ્રાતઃપૂજા મહાવલ્લભ ગણેશ મંદિરના આૅડિટોરિયમમાં રાખવામાં આવી હતી. સ્વામીશ્રીની ગાડી તે તરફ આગળ વધી રહી હતી. એક વળાંકે ચાલક જીતુભાઈએ ગાડીને ડાબી બાજુએ વાળી. આ જોતાં સ્વામીશ્રી બોલ્યા : 'આપણે સીધું નથી જવાનું ? એ રસ્તો નથી ?'
જીતુભાઈ કહે : 'મને આ બાજુથી આવવા જણાવવામાં આવ્યું છે.'
હકીકતે ગાડીને આૅડિટોરિયમના પાછળના દરવાજેથી લેવાની સૂચના હતી, પરંતુ ત્યાં જાણીતો કોઈ જ ઊભો રહ્યો ન હોવાથી સ્વામીશ્રીએ જે માર્ગ ચીંધ્યો હતો એ જ માર્ગે ગાડીને લાવવી પડી.
સ્વામીશ્રી બોલ્યા : 'સારું થયું, જે થયું એ ભગવાનની ઇચ્છાથી થયું. મંદિરનાં દર્શન કરવાં હતાં તે થઈ જશે. ભગવાનની ઇચ્છા જ આ હતી.'
દરેક બાબતોમાં સવળું લેવાની સ્વામીશ્રીની દૃષ્ટિ અને સાથે સાથે કોઈપણ મંદિરમાં દેવનાં દર્શન કરવાની મહારાજની આજ્ઞા અનુસાર ભક્તિ - આ બંનેનાં એકસાથે દર્શન થઈ રહ્યાં હતાં.
(તા. ૧૬-૫-૨૦૦૪, ન્યૂયોર્ક)