તા. 21-11-2010, બોચાસણ
સ્વામીશ્રીને કાર્તિકી પૂર્ણિમાના સમૈયામાં જવાની ઉતાવળ તો હતી જ, એટલે સમય થતાં સ્વામીશ્રી ઉતાવળ કરવા લાગ્યા. વ્હીલચૅરમાં સ્વામીશ્રી વિરાજમાન હતા. વ્હીલચૅરમાં હોવાથી આમ તો ચંપલની જરૂર ન હતી, પરંતુ બાજુમાં ઊભેલા બ્રહ્મવિહારી સ્વામી કહે : ‘ચંપલ પહેરો તો જરાક સારું લાગે. આમ ટીપટોપ રહેવું જોઈએ.’
આ સાંભળતાં જ સ્વામીશ્રી કહે : ‘ટીપટાપ કરવા જ નહીં. આપણે તો ભગવાન રાખે એમ જ રહેવું, ભજન કરવું. ટીપટાપમાં તો કેટલાય મરી ગયા.’
બ્રહ્મવિહારી સ્વામી કહે : ‘મારો કહેવાનો અર્થ વ્યવસ્થિત રહેવું એવો હતો.’
સ્વામીશ્રી કહે : ‘ટીપટોપ એટલે ગોટાળો જ થયો એમ સમજો.’
સ્વામીશ્રી હંમેશાં સાદાઈમાં જ માને છે. રજોગુણ તેઓને ગમતો નથી.