રાત્રે આરામમાં જતાં પહેલાં સ્વામીશ્રીને જળપાન કરાવીને મુખ લૂછવા માટે ટિસ્યૂ આપવામાં આવ્યું. તેનાથી મુખ લૂછતાં સ્વામીશ્રી કહે : ‘આપણે હવે ટિસ્યૂના 4 કટકા કરીએ.’
વાત જાણે એમ હતી કે તા. 12-3-2017ના રોજ રાત્રિભોજન પહેલાં વાતવાતમાં ભદ્રેશદાસ સ્વામીએ ડૉક્ટર સ્વામી વાપરે છે તે એક ટિસ્યૂનો બત્રીસમો ભાગ બતાવ્યો હતો. સ્વામીશ્રીના મુખના ભાવો પારખીને ભદ્રેશદાસ સ્વામીએ કહ્યું હતું : ‘આ વાત આપના માટે નથી, અમારા માટે છે. આપના માટે તો 100-100 માથાં કુરબાન કરીએ તો પણ ઓછું છે.’ પણ સ્વામીના મનમાં ત્યારથી રમતું હતું - ‘જરૂર વગરનો ટિસ્યૂનો એક ટુકડો પણ વપરાવો ન જોઈએ.’
તેનો હવેથી અમલ કરવાની દૃઢ રુચિ રજૂ કરી દીધી. સેવક સંત કાંઈ હા-ના કરે તે પહેલાં ટિસ્યૂ બતાવીને તાર્કિક રીતે સમજાવતાં કહે : ‘આટલું જ વપરાય ને !’ સ્વામીશ્રીએ મુખનો સ્પર્શ થયો હતો એટલો ભાગ બતાવ્યો. હવે કાંઈ બોલવાનું રહ્યું નહોતું.
‘મારું એ સારું એમ નહીં પણ સારું એ મારું’ - એ ભાવના સ્વામીશ્રીના જીવનમાં સૌએ મૂર્તિમંત જોઈ.