તા. 28-11-2010, બોચાસણ
ભોજન પછી અમેરિકાથી એક ફોન આવ્યો. એક મુમુક્ષુને પત્ની સાથે મતભેદ થયો હતો અને પરિણામે એ મુમુક્ષુ કોઈ અમેરિકન ધોળીને પરણવા માગતા હતા ને પત્ની સાથે છૂટાછેડા લેવા માગતા હતા. આ સંદર્ભમાં ત્યાં વિચરણ માટે ગયેલા સંતોએ પણ એ મુમુક્ષુને બોલાવીને બળની વાતો કરીને સમાધાન કર્યું હતું અને તેઓ અમેરિકન મહિલાને છોડી દેવા રાજી થયા હતા. આ સંદર્ભમાં એ મુમુક્ષુ સાથે ફોનમાં વાત કરતાં સ્વામીશ્રીએ કહ્યું : ‘કુટુંબમાં મતભેદ થયેલા છે એ વાત સાચી, પણ હવે સાથે રહીને સંપીને રહેજો. આગળ-પાછળનું ભૂલી જજો. તમારા બંનેનું જીવન સારી રીતે પસાર થાય અને શાંતિ રહે એ આશીર્વાદ છે. સમાધાન થયું છે તે કાયમ રહે એવું બળ રાખજો.’
એ મુમુક્ષુ પ્રાયશ્ચિત્તના ભાવ સાથે કહે : ‘રાજી રહેજો.’
સ્વામીશ્રી કહે : ‘અમારી આજ્ઞા પાળી છે તો ભગવાન રાજી થશે. મમત્વ મૂકી દીધું છે એ બહુ સારી વાત છે. ભગવાન આગળ મમત્વ મૂકવાનું છે.’
એ મુમુક્ષુ કહે : ‘ભૂલચૂક થઈ હોય તો માફ કરજો.’
સ્વામીશ્રી કહે : ‘તમે અમારા વચને બધું મૂકી દીધું છે, તો અમે રાજી છીએ.’