તા. 23-3-2017, નૈરોબી

સ્વામીશ્રી આજે નૈરોબીથી સાઉથ આફ્રિકા જવા હેલિકૉપ્ટર દ્વારા જોમો કેન્યાટા ઇન્ટરનેશનલ ઍરપોર્ટ પધાર્યા. હજુ વિમાનને ઊપડવાની વાર હતી. બે હરિભક્તોએ સ્વામીશ્રીને પૂછ્યું : ‘પ્રમુખસ્વામી મહારાજે અમને કહ્યું હતું કે આ દેશમાં રહેવું તે મહેમાનની પેઠે રહેવું. પરંતુ આપ અહીં આશીર્વાદમાં બોલ્યા હતા - અહીં ખૂબ સમૃદ્ધિ થવાની છે. તો શું કરવું ? અહીં કારોબાર વધારીએ ? બસ, આપ આશીર્વાદ આપી દો કે અમારી ખૂબ પ્રગતિ થાય.’
સ્વામીશ્રી કહે : ‘આ લોકમાં તો બધું જ ચાલે. આપણે તો અક્ષરધામનું જોવું.’
પરંતુ હરિભક્તોને આ લોકના જ આશીર્વાદ લેવા હતા. તેથી તેઓ કહે : ‘આપના યોગે અક્ષરધામ તો છે જ. અને આપ પણ સામે સાક્ષાત્ અક્ષરધામ છો. પણ ધંધામાં પણ પ્રગતિ થાય તેવા આશીર્વાદ આપો.’
સ્વામીશ્રીએ કહ્યું : ‘સામે સહેજે આવે તે લઈ લેવું. બહુ દોડાદોડી ન કરવી. સત્સંગના ભોગે ન કરવું.’
ગુણાતીત સત્પુરુષે પુનઃ આપણને દૃઢાવ્યું કે ‘જ્યાંથી અચાનક ઉચાળા ભરવા તે ઠેકાણે ઉદ્યમ ન કરવો, પણ જ્યાંથી કોટિ કલ્પે પણ ઉચાળા ન ભરવા તેને અર્થે ઉદ્યમ કરવો.’ પણ જીવની અવળાઈ એવી હોય છે કે તેને કેમે કરીને આ વાત સમજાતી જ નથી.