મુંબઈ, તા. ૧૮-૯-૧૯૬૯
સવારના કથા-પ્રસંગમાં યોગીજી મહારાજે કારિયાણીનું નવમું વચનામૃત વંચાવ્યું. એક સંત સામે જોઈને કહે, 'કેમ બોલતા નથી... કંઈક લાગે છે...!' પછી એમની પાસે વચનામૃતની લીટીઓ બોલાવી. બરાબર ધ્યાન આપવા કહ્યું. પછી ભગતજી મહારાજની વાત કરી : 'ગોરધનભાઈ કોઠારીએ બેચર ભગતને ઠપકો આપેલો તે રીસ ચઢી ગઈ. પછી ભગતજી મહારાજે લોયાનું સત્તરમું વચનામૃત વંચાવ્યું ને 'ટાટ' (ટાઇટ) કર્યા. ગોરધનભાઈની માફી મંગાવી. પછી મહાપુરુષદાસ (નામે) સાધુ થયા.' કથા-પ્રસંગમાં સ્વામીશ્રી અનેકવાર અંતર્યામીપણે સૌના સંકલ્પ પકડી, પ્રેરણા આપતા, બળ આપતા.
પછી બધા સંતોને પૂછ્યું, 'અમે સાજા થઈએ તેની માળા ફેરવો છો ?' અગિયાર માળા ફેરવવા કહ્યું, 'જલદી સાજા થઈ જઈએ...'
રોજ રાત્રે સ્વામીશ્રી પૂછતા, 'કંઈ સારા સમાચાર છે ?' સંતો કંઈક નવીન સમાચાર આપે. કંઈ સમાચાર ન હોય ત્યારે સૌ મૂંગા બેસી રહે, કંઈ બોલે નહિ. એટલે સ્વામીશ્રી શિખવાડતા કે કંઈ સમાચાર ન હોય તો એમ કહેવાનું કે 'આપ સાજા થઈ જાવ, ઈ સારા સમાચાર...'
જીવને ભગવાન ભજવાની કે પ્રગટની ભક્તિ કેમ કરવી... એ કંઈ ગમ પડે એમ નથી, પણ મોટા પુરુષ અનુગ્રહ કરી, એ રીત પણ આપણને શિખવાડે છે. જીવને ભગવાનમાં જોડવાની સ્વામીશ્રીની કોઈ અજબ રીત હતી !

- સાધુ ઈશ્વરચરણદાસ