રાજકોટ નજીક રતનપુરમાં એક જગ્યાએ પાંચેક હજાર વાછરડા રાખવામાં આવ્યા હતા. પ્રમુખસ્વામી મહારાજ એ સ્થળની મુલાકાતે ગયા. એ વખતે એ વાછરડાઓનો આખો સમૂહ સ્વામીશ્રીની પાછળ પાછળ ફરવા લાગ્યો. નવી અજાણી વ્યક્તિ પાછળ આ આકર્ષણ શેનું ? સ્વામીશ્રીએ આનું રહસ્ય જાણવા સ્થાનિક માણસોને પૂછ્યું એટલે જાણવા મળ્યું કે બેત્રણ દિવસથી આ પાંચ હજાર જીવોને ખાવા જ મળ્યું નથી. એટલે આ વાછરડાઓ નવી આવનાર વ્યક્તિ પાસે કંઈક આશા રાખીને એની પાછળ પાછળ ઘૂમે છે. આ વાછરડાઓને એમ જ થયું છે કે આપ એમના માટે કંઈક લઈને આવ્યા છો !
એ વખતે તો સ્વામીશ્રી કંઈ બોલ્યા નહીં, પણ સાંજે ગોંડલ આવીને તરત જ કોઠારી જ્ઞાનપ્રસાદ સ્વામીને બોલાવ્યા અને વાત કરી કે 'રતનપુરમાં જે રીતે વાછરડાઓ પાછળ દોડતા હતા એ હું જોઈ જ ન શક્યો. અત્યારે ને અત્યારે રાજકોટ યોગીસ્વરૂપ સ્વામીને કહેવડાવી દો કે ઘાસના છ ખટારા ત્યાં મોકલાવી દે.' દુષ્કાળ વખતે અત્યંત વણસી ગયેલી પરિસ્થિતિમાંથી પશુ અને માનવીને ઉગારી લેવા કેડ બાંધી હતી.