જેઓ પરમાત્મામાં અખંડ નિમગ્ન છે; એમને તો શાંતિનો પરમ અનુભવ સદા રહે છે, પરંતુ તેમના અલ્પ સાન્નિધ્યમાં આવનારને પણ એ નિર્વિકલ્પ શાંતિનો અનુભવ તેઓ કરાવી શકે છે. પ્રમુખસ્વામી મહારાજની સન્નિધિમાં અનેકને એ શાંતિનો અનુભવ પ્રાપ્ત થયો છે. એમાંના કેટલાક પ્રસંગો જોઈએ.
હૉલેન્ડવાસી ડચ હરિભક્ત હન કોપના યોગથી એક ડચ મહિલા જિનેટને સ્વામીશ્રી પ્રત્યે અત્યંત અનુરાગ થયો. તેમને સત્સંગનો રંગ લાગ્યો, પરંતુ તેમના પતિને સ્વામીશ્રીમાં આસ્થા નહિ. પતિને બીક પણ હતી કે તેમનાં પત્ની કદાચ વ્યક્તિસ્વાતંત્ર્ય ખોઈ બેસશે. એક દિવસ કુટુંબના આગ્રહથી તેઓ સ્વામીશ્રીને મળવા ગયા. તે વખતે સ્વામીશ્રી બેલ્જિયમ દેશના એન્ટવર્પ શહેરમાં સત્સંગ સભામાં બિરાજમાન હતા. સભા પછી મુલાકાત ગોઠવાઈ. સ્વામીશ્રીએ દુભાષિયા દ્વારા જિનેટના પતિ સાથે થોડી વાતો કરી અને તેમના હાથનો સ્પર્શ કર્યો. મુલાકાત બાદ જ્યારે તેઓ પાછા જઈ રહ્યા હતા ત્યારે જિનેટે પૂછ્યું, 'શું અનુભવ થયો ?' તેમના પતિ કહે, 'પ્રમુખસ્વામીને મળ્યા પહેલાં તેમને વિષે અટકળો કરવી વ્યર્થ છે. કોઈ અજાણી વ્યક્તિને હું સ્પર્શ કરવા ન દઉં પરંતુ સ્વામીશ્રીનો સ્પર્શ મને ગમ્યો. કાંઈક જુદો અનુભવ થયો. શાંતિ થઈ ગઈ.'