તા. 19-1-2017, આણંદ
આજે પ્રમુખસ્વામી મહારાજના આણંદમાં ઊજવાનાર 97મા જન્મજયંતી મહોત્સવની ઉદ્ઘોષ સભા યોજાઈ હતી. સ્વામીશ્રીએ આ સભામાં આશીર્વાદ આપ્યા હતા
કે ‘સ્વામીબાપાના ગુણો કલ્યાણકારી હતા અને તે લાવવા પડશે.’
ચેષ્ટાગાન પૂર્ણ થયા બાદ સ્વામીશ્રીએ આપેલા
આ આશીર્વાદની સંતો ક્રમમાં સ્મૃતિ કરવા માંડ્યા.
આત્મતૃપ્તદાસ સ્વામી કહે : ‘આ બધું કહીને આપે છેલ્લી વાત કરી તે ગમી... આપણે તો પ્રાર્થના જ કરવાની છે.’
પ્રિયવ્રતદાસ સ્વામી કહે : ‘પ્રાર્થના કરીએ તો જ ગુણો આવે એવું છે.’
સ્વામીશ્રી કહે : ‘છૂટકો જ નથી.’
પ્રિયવ્રતદાસ સ્વામી કહે : ‘આપે કહ્યું - ‘ગુણ તો ખરા, પણ ભગવાન ને સંતને ગમે તેવા ગુણ,’ એ વિશેષ વાત કરી.’
સ્વામીશ્રીએ દૃઢાવ્યું : ‘બીજા ગુણ નહીં.’
સંતો કહે : ‘તો અમારે તો શું કરવાનું, પ્રાર્થના જ ને ?! કે એવા ગુણો આપજો.’
સ્વામીશ્રી કહે : ‘હા, પણ સિન્સ્યરલી(અંતઃકરણપૂર્વક) પ્રાર્થના.’ પછી ભારપૂર્વકનો લહેકો કરતાં કહે : ‘ઉપરછલ્લું નહીં.’
પ્રિયવ્રતદાસ સ્વામીએ પૂછ્યું : ‘પણ સિન્સ્યરલી પ્રાર્થના થાય કેવી રીતે ?’
‘એ ઓટૉમેટીક આવે... ગદ્ગદ થઈ જાય. એને લાગે કે પ્રાર્થના કરવા જેવી જ છે. તો એ પ્રાર્થના બરાબર.’ સ્વામીશ્રીએ કહ્યું.
પ્રિયવ્રતદાસ સ્વામી કહે : ‘ડૉક્ટર સ્વામી બોલેલા - પ્રાર્થના કરવી ન પડે, થઈ જાય.’
સ્વામીશ્રીએ ‘હા’ પાડી સમર્થન આપ્યું.
આત્મતૃપ્તદાસ સ્વામી કહે : ‘યોગીબાપાએ કહ્યું છે - આજે પ્રાર્થના કરીએ ને કાલે ફરી જઈએ એવું ન થાય એ પ્રાર્થના. પણ એવું થાય છે કે ‘રાત્રે પ્રાર્થના કરીને સૂતા હોઈએ કે સવારે વહેલા ઉઠાડજો, પણ પછી થાય કે થોડું સૂઈ જઈએ.’
સ્વામીશ્રી હસીને બોલી પડ્યા : ‘બોગસ પ્રાર્થના.’
સૌ સંતો ખડખડાટ હસી પડ્યા.
આગળ સ્વામીશ્રી કહે : ‘સિન્સ્યરલી પ્રાર્થના કરી હોય તો ઊઠી જ જાય (જવાય).’
પછી કહે : ‘બનાવટી પ્રાર્થના ને અસલીમાં બહુ અંતર નથી. બેય સાચી લાગે. આમ બેસે (હાથ જોડીને આંખો મીંચીને ગદ્ગદ કંઠે પ્રાર્થના કરતા હોય તેવી મુદ્રા કરી), પણ બોગસ હોય, સાવ બોગસ; પોઝ (મુદ્રા) બધો બરાબર !’
આત્મતૃપ્તદાસ સ્વામીએ પૂછ્યું : ‘આપને તો ખબર પડી જાય ને કે પ્રાર્થના સાચી છે કે ખોટી ?’
સ્વામીશ્રી કહે : ‘હા.’
આત્મતૃપ્તદાસ સ્વામી કહે : ‘સાચી હોય તો કામ કરી દો ને ?’
‘તરત જ... ઇન્સ્ટન્ટ.’ સ્વામીશ્રીએ કહ્યંુ.
પ્રિયવ્રતદાસ સ્વામી કહે : ‘તો હવે એના માટેય પ્રાર્થના કરવાની કે સાચી પ્રાર્થના થાય.’
સૌ હસી પડ્યા.
‘પણ એય બોગસ થાય.’ સ્વામીશ્રીએ આપણી મનોદશા છતી કરી દીધી.
પછી કહે : ‘સાચી પ્રાર્થના તો એક જ વાર કરવી પડે.’
પ્રિયવ્રતદાસ સ્વામીએ પૂછ્યું : ‘સાચી પ્રાર્થના હોય તો એક જ વારમાં કામ થઈ જાય ?’
‘હા’.
પછી સ્વામીશ્રી કહે : ‘બોગસની સિરીઝ(શૃંખલા) ચાલે. બોગસ બોગસ બોગસ...’
પ્રાર્થનામાં રહી જતી આવી સૂક્ષ્મ ક્ષતિઓ તો જે પ્રાર્થના સાંભળતું હોય એ જ પકડી શકે, એવી અનુભૂતિ સૌને થઈ.