તા. 5-12-2017, જયપુર

આજે રાત્રિભોજન વખતે સ્વામીશ્રી કહે : ‘આજે (સભામાં) ધર્મપ્રકાશ સ્વામીનું નામ ન આવ્યું.’
વાત જાણે એમ હતી કે આજે સભામાં વિવિધ સંતો હાર પહેરાવવા આગળ પધાર્યા હતા, એમાં ધર્મપ્રકાશદાસ સ્વામીનું નામ બોલવાનું રહી ગયું હતું. સ્વામીશ્રીને આ સહેજે ગમ્યું નહોતું કારણ કે 1983થી શરૂઆતનાં 18 વર્ષ સુધી તેઓએ આ વિસ્તારમાં ખૂબ દાખડાભર્યું વિચરણ કર્યું હતું.
સેવક સંતોએ કહ્યું : ‘ભોજન પૂર્ણ થઈ જાય પછી તેમને બોલાવી લઈએ.’
પણ સ્વામીશ્રીએ ઇચ્છા દર્શાવી કે ‘તેમને અત્યારે જ બોલાવો.’
ધર્મપ્રકાશદાસ સ્વામીને બોલાવવામાં આવ્યા. સ્વામીશ્રીએ જમતાં જમતાં જ આજે ગુરુપૂજન વખતે તેઓના જમણા હસ્તે બાંધેલી નાડાછડી ડાબા હાથે છોડી નાંખી અને પછી જમણો હાથ લૂછીને જાતે જ ધર્મપ્રકાશદાસ સ્વામીના કાંડે નાડાછડી બાંધી દીધી. વળી, તેઓને થાળમાંથી પ્રસાદ પણ આપ્યો અને બોલ્યા : ‘શરૂઆતમાં સાથે બહુ ફર્યા.’
આયોજક સંતોએ પણ સ્વામીશ્રીની માફી માગતાં કહ્યું : ‘સ્વામી ! અમારી ભૂલ થઈ ગઈ.’
સ્વામીશ્રી ધર્મપ્રકાશદાસ સ્વામીને કહે : ‘તમને રજા મળતી નહોતી, પછી હૉસ્પિટલમાં તમારા પિતાજીને મળવા ગયા ને રજા મળી ગઈ !’
સંતોએ ધર્મપ્રકાશદાસ સ્વામીને પૂછ્યું : ‘આ ક્યારની વાત છે ?’
તેમણે કહ્યું : ‘1975, મુંબઈ. સાત વર્ષના સંઘર્ષ પછી રજા મળી હતી.’
પણ ખૂબીની વાત એ હતી કે 42 વર્ષ પહેલાંની વાત પણ સ્વામીશ્રીને કેટલી ઇદમ્ યાદ છે !
સ્વામીશ્રીની સ્મૃતિમંજૂષામાં આવું તો કેટ-કેટલું સંગૃહીત છે !!