એક સત્સંગી યુવાનના બનેવી સ્વામીશ્રીનાં દર્શને આવ્યા હતા. તેઓને આ દેશનો રંગ લાગી ચૂક્યો હતો. સ્વામીશ્રીએ તેઓને સમજાવતાં કહ્યું : 'આપણે ભારતીય છીએ. પેલું બધું ખાવા-પીવાનું મૂકો હવે !'
થોડી વાર સુધી તો પેલા ભાઈ કશું જ બોલ્યા નહીં. કદાચ શું બોલવું એનો પણ એમને ખ્યાલ નહીં હોય. અંતરમાં એને આ બધું મૂકવાની તૈયારી હતી નહીં. સ્વામીશ્રીને ખચકાતાં સ્વરે કહે : 'ટ્રાય કરીશ.'
'આમાં ટ્રાય શું કરવાની ? મૂક્યું એટલે મૂક્યું.' સ્વામીશ્રીએ થોડા વિશેષ હેતથી ભારપૂર્વક કહ્યું.
પેલા કહે : 'પછી મારી બોડી ચાલશેને ?!'
એમની આ દલીલ અને અજ્ઞાનતા ઉપર થોડી દયા સાથે સ્વામીશ્રી કહે : 'આ ખાવ છો એટલે બોડી બગડે છે. ખાવાનું મૂકી દેશો એટલે બધું જ સારું થઈ જશે. નહીં ખાવાથી બોડી બગડે જ નહીં. આ તો બધાં મનનાં કારણ છે.'
સ્વામીશ્રીની વાતમાં વિશ્વાસ લાવીને પેલા ભાઈએ વ્યસનો મૂકવાનાં અને માંસાહાર ન કરવાના નિયમ લીધા.
(તા. ૮-૫-૨૦૦૪, શનિવાર, લંડન)