લંડન, તા. ૧૨-૬-૧૯૭૦
અહીં જુદાં જુદાં વર્તમાનપત્રોમાં પ્રગટ થતાં યોગીજી મહારાજના વિવિધ સમાચારોને કારણે ઘણા ખબરપત્રીઓ સ્વામીશ્રી પાસે દોડી આવતા હતા. ખૂબ જ શિસ્તથી સ્વામીશ્રીની અદબ તેઓ સાચવતા. પ્રશ્નો ઘણું ખરું લખેલા તૈયાર હોય. તે પણ ખૂબ જ સભ્યતાથી પૂછે. સ્વામીશ્રી જે ઉત્તરો આપે તે સ્વીકારે, ખોટી દલીલ કે ચર્ચા નહિ. પશ્ચિમના ખબરપત્રીઓએ સ્વામીશ્રીની સારી આમન્યા સાચવી. એમના પ્રશ્નો પણ ઘણીવાર એમ લાગે કે ભગવત્પ્રેરણાથી જ પુછાતા હશે.
આજે 'ન્યૂઝ આૅફ ધી વર્લ્ડ'ના ખબરપત્રી ડેવિડ મર્ટન્સ આવેલા.
ડેવિડ : 'તમે ભગવાનના સાચા ભક્ત છો તેની પ્રતીતિ બીજાને કેમ થાય ?'
સ્વામીશ્રી : 'જેને ભગવાનનો સંબંધ થયો છે તે બધાને થાય.'
ડેવિડ : 'આ જગતમાં આપ કેવી રીતે રહો છો ?'
સ્વામીશ્રી : 'મહારાજે કહ્યું છે કે આ જગત નાશવંત, તુચ્છ છે, તો તેમ માનીને આ દુનિયામાં રહીએ છીએ. જળકમળવત્‌ જેવું રહીએ છીએ.'
ડેવિડ : 'મૂર્તિપ્રતિષ્ઠામાં પ્રાણપ્રતિષ્ઠા થાય છે તો તેમાં આપનો પ્રાણ પ્રતિષ્ઠિત થાય છે કે શ્રીજીમહારાજનો ?'
સ્વામીશ્રી : 'મૂર્તિઓમાં સત્પુરુષ મહારાજનો પ્રાણ રેડે છે. તેથી તેમાં મહારાજનો પ્રવેશ થઈ જાય.'
ડેવિડ : 'આપ ભગવાન સાથે વાત કરો તે બીજા કેમ જાણે ?'
સ્વામીશ્રી : 'એ ભાવને પામ્યો હોય તે જાણે.

- સાધુ ઈશ્વરચરણદાસ